Ищим сдам квартиру посуточно Киев здесь Детальная информация нарды резные ручной работы здесь.
1  2  3  4  5  6  7 
Назад
Размер шрифта

Больше.Сброс.Меньше

Третья книга Маккавейская

Славянский текст

1
1 Егдá Филопáторъ увѣ́да от возвѣсти́вшихъ бы́вшее держи́мыхъ от себé мѣ́стъ отня́тiе Антióхомъ, заповѣ́да всѣ́мъ вóемъ свои́мъ пѣшцéмъ и кóнникомъ [собрáтися]: взя́въ же и сестрý свою́ Арсинóю, изы́де вскóрѣ дáже до Рафíйскихъ мѣ́стъ, идѣ́же ополчи́шася вóи и́же при Антióхѣ.
2 Ѳеодóтъ же нѣ́кто испóлнити навѣ́тъ умы́сливъ, поя́тъ предвручéнныя емý крѣпчáйшыя орýжники Птоломéевы, прiи́де нóщiю на Птоломéевъ намéтъ, я́ко да сáмъ убiéтъ егó и си́мъ разруши́тъ брáнь.
3 Сегó же проведé Досиѳéй сы́нъ Дрими́ловъ нарицáемый, рóдомъ Иудéанинъ, послѣди́ же измѣни́въ закóны и от отéческихъ догмáтовъ отчужди́вся, незнамени́та нѣ́коего заключи́ въ намéтѣ тóмъ, емýже случи́ся подъя́ти óнаго мучéнiе.
4 Состáвленнѣй же бы́вшей тя́жцѣй брáни и вóемъ Антióховымъ пáче мужáющымся, Арсинóа безпрестáни проходя́щи вóи, со умилéнiемъ и слезáми плетени́цы влáсъ разрѣши́вши, моля́ше, да помóгутъ сами́мъ себѣ́ и чáдомъ и женáмъ мýжественно, обѣщавáющи дáти побѣди́вшымъ комýждо двá мнáса злáта.
5 И тáко супостáтомъ случи́ся рукосѣчéнiемъ побѣждéнымъ бы́ти и мнóгимъ плѣнéннымъ я́тымъ бы́ти.
6 Получи́въ же намѣ́ренiе, суди́ бли́жнiя грáды пришéдъ утѣ́шити.
7 Сотвори́въ же сiя́ и кáпищемъ дáры дáвъ, мýжественны подрýчныя постáви.
8 Егдá же Иудéе послáша от пресви́теръ и старѣ́йшинъ къ Филопáтору поздравля́ющихъ егó и дáры принося́щихъ и о случи́вшихся благополýчiихъ срáдующихся, случи́ся емý пáче вожделѣ́ти, да скорѣ́е къ ни́мъ прiи́детъ.
9 Пришéдъ же во Иерусали́мъ, и вели́кому Бóгу пожрé, и благодарéнiе воздáвъ, и прóчая, я́же лѣ́ть бѣ́ мѣ́сту, сотвори́.
10 И вшéдъ на мѣ́сто, и худóжеству и благолѣ́пiю егó удиви́вся, тáкожде и благочи́нiю хрáма почуди́вся, съ вожделѣ́нiемъ зѣ́лнымъ восхотѣ́ вни́ти во святи́лище.
11 О́нымъ же рéкшымъ, никáкоже подобáетъ бы́ти семý, занé нижé сýщымъ от рóда нáшего лѣ́ть éсть входи́ти [тáмо], нижé всѣ́мъ иерéомъ, но тóкмо еди́ному пéрвѣйшему всѣ́хъ архiерéови, и семý еди́ножды въ лѣ́то, óнъ же никáкоже восхотѣ́ послýшати.
12 Закóнъ же презрѣ́въ, не остáся похотѣ́нiя своегó, глагóля: подобáетъ вни́ти ми́: áще же они́ и лишáются сицевы́я чéсти, но мнѣ́ не подобáетъ. И вопрошáше, чесó рáди приходя́щу емý во вся́кое кáпище ни еди́нъ возбрани́ от присýщихъ?
13 Нѣ́кто же неразсуди́телио речé: злѣ́ сáмо сié чýдо смы́слися. Бы́вшу же, речé, семý, кóея рáди вины́ не вся́ко вни́ти ми́ подобáетъ, и хотя́щымъ и́мъ, или́ ни́?
14 Иерéомъ же во святы́хъ одéждахъ припáдшымъ и моля́щымъ вели́каго Бóга помощи́ и́мъ въ настоя́щей и́хъ нýжди и устремлéнiе злѣ́ нашéдшаго премѣни́ти: и внегдá вóпля со слезáми хрáмъ напóлниша, тогдá, и́же во грáдѣ остáвшiися возмути́вшеся, изскочи́ша, безвѣ́стно мня́ще бы́ти твори́мое.
15 Тáкожде и заключéнныя дѣ́вы въ чертóзѣхъ съ рóждшими избѣгóша, и пéпеломъ и прáхомъ главы́ посы́павшя, рыдáнiя и стенáнiя стóгны испóлниша:
16 ины́я же всецѣ́ло укрáшенныя, на срѣ́тенiе уготóванныя чертóги и подобáющiй сты́дъ остáвльшя, течéнiе нечи́нное во грáдѣ творя́ху.
17 И новорождéнныя младéнцы, мáтери же кýпно и дои́лицы оставля́юшя сѣ́мо и овáмо, еди́ны по домѣ́хъ, другíя же по путéхъ, неудéржно въ превы́шнее святи́лище собирáхуся.
18 Бя́ше же разли́чна моли́тва въ тóе сóбранныхъ о начинáемыхъ от негó беззакóнно.
19 Съ си́ми же грáждане дерзнýвше не попускáху емý конéчно належáщу и намѣ́ренiе своé испóлнити умы́слившу: и возгласи́вше вооружи́тися комýждо и мýжественнѣ за отéческiй закóнъ умрéти, вéлiе смятéнiе сотвори́ша на мѣ́стѣ.
20 Едвá же от старѣ́йшинъ и пресви́теровъ удéржани, на тóмже молéнiя стоя́нiи стáша.
21 И мнóжество ýбо людíй, я́ко и прéжде, въ си́хъ пребывáше моля́щееся: а и́же при цари́ старѣ́йшины мнóгажды покушáхуся прегóрдый егó ýмъ премѣни́ти от намѣ́реннаго совѣ́та:
22 óнъ же дéрзостенъ бы́въ и вся́ отри́нувъ, ужé и вхóдъ творя́ше, соверши́ти непщýя предрѣчéнное.
23 Сiя́ ýбо и сýщiи при нéмъ зря́ще, обрати́шася éже съ нáшими призывáти вся́ содержáщаго, дабы́ присýтствующымъ помóглъ, не попускáя беззакóннаго и прегóрдаго дѣ́ла.
24 От премнóгаго же и болѣ́зненнаго нарóдовъ совокýпленнаго вóпля, несказáнный нѣ́кiй бѣ́ кли́чь.
25 Мня́шеся бо, я́ко не тóкмо человѣ́цы, но и стѣ́ны и вéсь помóстъ вопiéтъ, áки бы ужé тогдá вси́ смéрть прiимáли за осквернéнiе мѣ́ста.
2
1 Архiерéй ýбо Си́монъ проти́ву хрáма преклони́въ колѣ́на и рýцѣ простéръ благочи́нно, творя́ше моли́тву сiю́:
2 Гóсподи, Гóсподи, Царю́ небéсный и Влады́ко вся́каго создáнiя, Святы́й во святы́хъ, Единоначáлниче, Вседержи́телю, вонми́ нáмъ озлóбленнымъ от непреподóбнаго и сквéрнаго, продéрзостiю и си́лою напыщéннаго:
3 Ты́ бо, создáвый вся́ и вся́ содержáщь, си́ленъ и прáведенъ еси́, и со укори́зною и гóрдостiю чтó либо творя́щымъ сýдиши:
4 Ты́ прéжде беззакóнiе сотвóршихъ, въ ни́хже и исполи́ни бы́ша, на си́лу и дéрзость уповáвшiи, погуби́лъ еси́, навéдъ на ни́хъ безмѣ́рную вóду:
5 Ты́ прегóрдая творя́щихъ Cодóмлянъ, въ я́вныхъ злóбахъ бы́вшихъ, огнéмъ и жýпеломъ попали́лъ еси́, о́бразъ по ни́хъ бýдущымъ состáвль:
6 Ты́ свирѣ́паго фараóна поработи́вшаго лю́ди твоя́ святы́я Изрáиля, разли́чными и мнóгими искуси́лъ еси́ мýками, показáвъ си́лу твою́,
7 и во óнѣхъ вéлiю держáву твою́ яви́лъ еси́, и гоня́щаго егó съ колесни́цами и нарóдовъ мнóжествомъ погрузи́лъ еси́ во глубинѣ́ морстѣ́й, вѣ́рующихъ же Тебѣ́, вся́кимъ создáнiемъ обладáющему, неврéдны превéлъ еси́: и́же и ви́дѣвше дѣлá Твоея́ руки́, восхвали́ша Тебé Вседержи́теля:
8 Ты́, Царю́, создáвый безконéчную и безмѣ́рную зéмлю, избрáлъ еси́ грáдъ сéй и освяти́лъ еси́ мѣ́сто сié во и́мя Тебѣ́ ничтóже трéбующему, и прослáвилъ еси́ во явлéнiи великолѣ́пнѣмъ, составлéнiе сотвори́вый егó ко слáвѣ вели́каго и честнáго и́мене Твоегó:
9 и лю́бящь дóмъ Изрáилевъ, обѣщáлъ еси́, я́ко áще бýдетъ нáмъ злоключéнiе и объи́метъ нáсъ тѣснотá, и пришéдше на мѣ́сто сié помóлимся, услы́шиши моли́тву нáшу:
10 и ýбо вѣ́ренъ еси́ и и́стиненъ, а понéже мнóгащи оскорблéннымъ бы́вшымъ отцéмъ нáшымъ, помóглъ еси́ и́мъ Ты́ во смирéнiи и избáвилъ еси́ я́ от вели́кихъ бѣ́дъ:
11 сé ýбо ны́нѣ́, Святы́й Царю́, мнóгихъ рáди и вели́кихъ нáшихъ грѣхóвъ стрáждемъ, и повинýемся врагóмъ нáшымъ, и есмы́ въ нéмощехъ:
12 въ нáшемъ же низпадéнiи дéрзостивый и сквéрный сéй начинáетъ оби́дѣти на земли́ возвы́шенное и́мени слáвы Твоея́ святóе мѣ́сто:
13 áще бо и жили́ще Твоé небо небесé непости́жно человѣ́комъ éсть, но понéже благоволи́лъ еси́ слáву Твою́ въ лю́дехъ твои́хъ Изрáили, освяти́лъ еси́ мѣ́сто сié:
14 да не отмсти́ши нáмъ нечистотóю си́хъ, нижé да накáжеши нáсъ сквéрною си́хъ: да не похвáлятся пребеззакóннiи въ я́рости своéй, нижé да возрáдуются въ гóрдости язы́ка своегó, глагóлюще: мы́ попрáхомъ хрáмъ святы́ни, я́коже попирáются хрáмы мéрзостей:
15 остáви грѣхи́ нáшя и разруши́ непрáвости нáшя и яви́ ми́лость Твою́ въ чáсъ сéй, скóро да предваря́тъ ны́ щедрóты Твоя́, и дáждь хвалéнiя во устá низпáдшихъ и сокрушéнныхъ душáми, сотвори́вый нáмъ ми́ръ.
16 Здѣ́ всеви́децъ Бóгъ и прéжде всѣ́хъ Святы́й во святы́хъ, услы́шавъ моли́тву смирéнiя, хулóю и дéрзостiю вельми́ вознесéннаго уязви́, отсю́ду и отонýду сотря́съ егó, я́коже трóсть вѣ́тромъ, я́ко и на помóстѣ недѣйстви́телну ктомý лежáти и ýдами разслáбленну, нижé прогласи́ти возмощи́ емý, прáведнымъ уя́звленну судóмъ.
17 Отню́дуже дрýзи и тѣ́ла егó охрани́теле внезáпную и óструю ви́дѣвше объе́мшую егó кáзнь, убоя́вшеся, да и животá не лиши́тся, вскóрѣ егó извлекóша вóнъ, превели́кимъ уя́звленни стрáхомъ.
18 По врéмени же пришéдъ въ себé, никáкоже въ покая́нiе прiи́де накáзанный и съ прещéнiемъ гóрькимъ оти́де.
19 Пришéдъ же во Еги́петъ и злóбу умножáющь чрезъ предрѣчéнныхъ притрапéзниковъ и другóвъ от вся́кiя прáвды отлучéнныхъ, не тóкмо безчи́сленными студодѣя́нiи довóлствовася, но и на толи́кую дéрзость произы́де, я́ко хулéнiя на мѣ́стѣхъ состáви, и мнóзи дрýзи взирáюще на цáрское хотѣ́нiе, и тíи послѣ́доваша óнаго вóли.
20 И предложи́ цáрь нарóднѣ на язы́къ Иудéйскiй издáти хулý: и повелѣ́въ на столпѣ́ сýщемъ при дворѣ́ постáвити и́дола, извая́ писáнiе: éже ни еди́ному от нежрýщихъ во святáя и́хъ входи́ти, всѣ́хъ же Иудéевъ вписáти въ лю́ди просты́я и въ служéбный чи́нъ постáвити, сопроти́въ же глагóлющихъ нýждею я́тыхъ животá лиши́ти.
21 Тѣ́хже запи́санныхъ назнáменовати и огнéмъ на тѣ́лѣ знамени́тымъ Дiони́са ки́ссовымъ листóмъ, и тѣ́хъ отлучи́ти въ преждесокрашéнную свобóду.
22 Но да не всѣ́мъ ненави́димь яви́тся, подписá: áще же нѣ́цыи от ни́хъ произвóлятъ жи́телствовати во обря́дѣхъ язы́ческихъ, сíи рáвни грáжданомъ Александри́йскимъ бýдутъ.
23 Тѣ́мже ýбо нѣ́цыи во грáдѣ, благочéстiя своя́ ни во чтóже вмѣня́юще, съ рáдостiю себé вдáша, мня́ще себé áки вéлiей нѣ́коей имýщiи приобщи́тися слáвѣ от бýдущаго со царéмъ сожи́телства.
24 Мнóжайшiи же хрáброю душéю укрѣпи́шася и не отступи́ша от благочéстiя: и срéбреники за живóтъ обѣщáвше во измѣнéнiе дáти, безбоя́зненно тщáхуся свободи́ти себé от вписáнiй: благонадéжни бы́ша пóмощь получи́ти,
25 а отлучи́вшихся от ни́хъ гнушáхуся, и áки супостáтовъ рóду своемý суди́ша, и óбщаго сожи́телства и благодѣя́нiя лишáху.
3
1 Сiя́ увѣ́давъ нечести́вый въ толи́ко разгнѣ́ванiе прiи́де, я́ко не тóкмо на сýщихъ во Александрíи разгнѣ́вася, но и сýщымъ во странѣ́ тя́жцѣ сопроти́вися и повелѣ́ тщáтелнѣ всѣ́хъ собрáти въ кýпу и лютѣ́йшею смéртiю животá лиши́ти.
2 Си́мъ же устрóенымъ бы́вшымъ, вѣ́сть злáя происхождáше на рóдъ [Иудéйскiй], человѣ́комъ согласýющымъ на злотворéнiе, егдá винá дадéся ко уставлéнiю, áки бы и́мъ возбраня́ли от закóновъ.
3 Но Иудéе бѣ́ху сохраня́юще ко царéмъ ýбо неразврáтное послушáнiе и вѣ́рность, чествýюще же Бóга и закóна егó держáшеся, олучéнiе творя́ху въ нѣ́кiихъ и отмѣ́ны: ея́же рáди вины́ нѣ́кiимъ ненави́дими явля́хуся: прáведныхъ же благотворéнiемъ украшáюще сожи́телство, всѣ́мъ человѣ́комъ благопрiя́тни сотвори́шася.
4 Тѣ́мже ýбо о рóдѣ во всѣ́хъ слáвимое благотворéнiе иноплемéнницы ни во чтó вмѣня́ху, разли́чiе же въ поклонéнiихъ и брáшнахъ разглашáху, глагóлюще, я́ко сíи человѣ́цы нижé царю́, нижé вóемъ соглáсни сýть, но враждéбни сýть и вельми́ нѣ́како дѣлóмъ проти́вни: и нестерпи́мымъ огласи́ша и́хъ хулéнiемъ.
5 Е́ллини же сýщiи во грáдѣ ни чи́мъ оби́дими от ни́хъ, ви́дяще смятéнiе нечáянное на ни́хъ и собрáнiя внезáпно бывáющая, помощи́ ýбо не могóша: мучи́телское бо бя́ше повелѣ́нiе.
6 Утѣшáху же и негодовáху и минýти си́мъ вскóрѣ непщевáху, и́бо не бýдетъ тáко презрѣ́но толи́кое мнóжество ничтóже согрѣши́вшее.
7 И ужé нѣ́цыи сосѣ́ди и дрýзи и сокупéчствующiи, тáйно нѣ́кiихъ призвáвше, вѣ́рность дая́ху помогáти и вся́кое усéрдiе твори́ти къ защищéнiю.
8 О́нъ же ýбо по настоя́щему благодéнствiю разгордѣвáяся и не зря́ вели́каго Бóга держáвы, непщýя же вы́ну въ сицевóмъ пребывáти злосовѣ́тiи, написá на ня́ послáнiе сицевóе:
9 цáрь Птоломéй Филопáторъ сýщымъ во Еги́птѣ и по мѣстóмъ страти́гомъ и вóиномъ рáдоватися и здрáвствовати: здрáвстую же и áзъ сáмъ, и вéщы нáшя:
10 по бы́вшей нáмъ рáти во Асíи, ю́же вѣ́сте и вы́, я́же богóвъ нечáяннымъ споборéнiемъ и нáшею си́лою разýмно въ дóбрый конéцъ приведéся, суди́хомъ не нýждею орýжiя, но крóтостiю и мнóгимъ человѣ́колюбiемъ благоустрóити живýщыя въ килисирíи и Финикíи язы́ки и благотвори́ти рáдостнѣ:
11 и сýщымъ во градѣ́хъ кáпищемъ дáвше дохóды премнóги, прiидóхомъ и во Иерусали́мъ, возшéдше почти́ти хрáмъ суемýдренныхъ и никогдáже престаю́щихъ от безýмiя:
12 они́ же слóвомъ ýбо прiя́ша нáше пришéствiе, дѣ́ломъ же лéстнѣ, возжелѣ́вшымъ нáмъ вни́ти во хрáмъ и́хъ и лѣ́потными и добрѣ́йшими дáры почти́ти, тíи по дрéвней [своéй] гóрдости возбрани́ша нáмъ вни́ти, немощнѣ́йшiи [сýще] нáшея си́лы, за человѣколю́бiе, éже и́мамы ко всѣ́мъ человѣ́комъ,
13 своé же зломы́слiе къ нáмъ явлéнно показáвше, áки еди́ни тóчiю от язы́къ царéмъ и и́хъ благодѣ́телемъ вы́и не покаря́юще, ничтóже прáведно хóщутъ носи́ти:
14 мы́ же си́хъ безýмiе усмотри́вше, и съ побѣ́дою возврати́вшеся, и во Еги́птѣ со всѣ́ми язы́ки любочеловѣ́чнѣ срѣ́тившеся, я́коже подобáше, сотвори́хомъ:
15 и въ тѣ́хъ ко единоплемéнникомъ и́хъ непамятозлóбiе всѣ́мъ сказýюще, и рáди споборéнiя, и ввѣ́ренныя съ простотóю и́мъ издрéвле безчи́сленныя вéщы дерзнýвше премѣни́ти, восхотѣ́хомъ и граждáнства Александрíйскаго сподóбити и́хъ и причáстники всегдá жерцéмъ постáвити:
16 они́ же въ проти́вность прiéмлюще, и прирóднымъ злонрáвiемъ дóброе отри́нувше, и при́сно въ злóе уклоня́ющеся, не тóкмо отри́нуша честнóе граждáнство, но и гнушáются слóвомъ и дѣ́ломъ, молчáнiемъ тѣ́хъ, и́же немнóгiи от ни́хъ къ нáмъ нелéстнѣ доброжелáтельни сýть, по вся́къ чáсъ чáюще, я́ко мы́ вскóрѣ нестрóйнымъ житiéмъ низврати́мъ исправлéнiя.
17 Тѣ́мже и показáньми дóбрѣ увѣщáвшеся, я́ко сíи по вся́кому о́бразу зломы́слятъ нáмъ, и мы́ проразумѣвáюще, да не когдá внезáпну потóмъ мятéжу нашéдшу на ны́, си́хъ нечести́выхъ созади́ предáтелей и вáрваровъ возъимѣ́емъ супостáтовъ,
18 повелѣ́хомъ ýбо, егдá прiи́детъ къ вáмъ послáнiе сié, вскóрѣ во еди́нъ чáсъ вышепи́санныхъ собрáвше съ женáми и чáды, съ досáдою и озлоблéнiемъ послáти къ нáмъ ýзами желѣ́зными отвсю́ду оковáнныхъ, на лю́тое и злослáвное подобáющее зломы́слящымъ убiéнiе:
19 по умучéнiи бо си́хъ уповáемъ, я́ко въ прóчее врéмя совершéнно нáмъ вéщы во благостоя́нiи и въ предóбрѣмъ состоя́нiи устрóятся.
20 А́ще же ктó скры́етъ коегó либо Иудéанина, от стáра дáже до младенца и дáже до ссýщихъ, прелютѣ́йшими мýками умýченъ бýдетъ со всѣ́мъ дóмомъ:
21 áще же ктó возвѣсти́тъ, сéй прiи́метъ имѣ́нiе подпáдшаго кáзни, ещé же и от цáрскаго сребрá дрáхмъ двѣ́ ты́сящы, и свобóду получи́тъ, и увѣнчáется:
22 вся́ко же мѣ́сто, идѣ́же áще я́тъ бýдетъ весьмá кры́ющься Иудéанинъ, пýсто и огнéмъ сожжéно да бýдетъ, и вся́кому смéртному естествý по всемý неключи́мо да бýдетъ въ вѣ́чное врéмя. И ýбо послáнiя о́бразъ си́це напи́санъ бы́сть.
4
1 И вездѣ́, идѣ́же прiи́де сié повелѣ́нiе, нарóднѣ составля́шеся язы́комъ ýбо пи́ръ съ восклицáньми и рáдостiю, áки бы заматерѣ́лая издрéвле въ мы́сли и́хъ, ны́нѣ съ дéрзостiю явля́лася враждá:
2 Иудéомъ же бя́ше непрестаю́щь плáчь и зѣлó рыдáтеленъ со слезáми вóпль, стенáньми сожжéнну сýщу сéрдцу и́хъ отвсю́ду, рыдáющихъ о нечáяннѣй внезáпу устáвленнѣй на ни́хъ поги́бели.
3 Кáя странá или́ грáдъ, или́ кóе весьмá обитáемое мѣ́сто, или́ кíя стóгны плáча и рыдáнiя о ни́хъ не наполня́хуся?
4 Си́це бо съ гóрькою и немилосéрдою душéю от страти́говъ сýщихъ по градóмъ единодýшно изсылáеми бя́ху [ко царю́], я́ко о необы́чныхъ мучéнiихъ, и нѣ́цыи от врагóвъ взéмлюще предъ очесá óбщую бѣ́дность и помышля́юще неизвѣ́стную житiя́ измѣ́ну, [да не когдá и и́мъ случи́тся сié,] плáкаху о пребѣ́дственнѣмъ и́хъ изслáнiи.
5 Ведóмо бо бя́ше престарѣ́лыхъ мнóжество сѣди́нами укрáшенныхъ, рáди бы́вшаго от стáрости коснéнiя нóгъ сля́ченыхъ, за наси́льное изгнáнiе стремлéнiя, безъ вся́каго студá злоупотребля́ющихъ ко скóрому шéствiю.
6 Тáкожде и недáвно сочетáвшыяся къ житiя́ сообщéнiю, въ брáчный вшéдшыя чертóгъ отрокови́цы, вмѣ́сто весéлiя взéмшя плáчь, и прáхомъ мироухáнныя власы́ посы́павшя, непокровéны же ведóмы, рыдáнiе вмѣ́сто пѣ́сней брáчныхъ единодýшно начинáху, áки растéрзаны иноязы́чныхъ мучéнiемъ, и свя́заны нарóднѣ влекóмы бы́ша съ нýждею дáже до ввержéнiя въ корáбль.
7 Супрýзи же си́хъ въ цвѣтýщемъ ю́ношестѣмъ вóзрастѣ, ýжами вмѣ́сто вѣнцéвъ на шíяхъ оплетéни, вмѣ́сто пи́ршества и ю́ношескаго упокоéнiя прóчыя дни́ брáка въ рыдáнiихъ провождáху, при ногáхъ ужé ви́дяще áдъ лежáщь.
8 Ведéни же бы́ша звѣри́нымъ о́бразомъ, влекóми во ýзахъ желѣ́зныхъ нýждныхъ: и óви ýбо къ сѣдáлищемъ корáбленымъ пригвождéни бы́ша шíями, инíи же за нóги нерастéрзными пýтами укрѣплéни, ещé же и свéрху чáстыми дщи́цами обложéнными от свѣ́та заключéни, я́ко да отвсю́ду помрачéни очесы́, поведéнiе áки навѣ́тницы во всéмъ плáванiи имѣ́ютъ.
9 Си́мъ же на глагóлемую ладiю́ приведéнымъ бы́вшымъ, и плáванiю соверши́вшуся, я́коже бѣ́ повелѣ́но от царя́, повелѣ́ и́хъ предъ грáдомъ на конористáтелнѣмъ мѣ́стѣ постáвити, на вели́цѣмъ прострáнствѣ, и на поругáнiе вельми́ угóднѣмъ всѣ́мъ входя́щымъ во грáдъ, тáкожде и оттýду во странý посылáемымъ ко изшéствiю: да нижé съ вóями егó сообщáются, нижé отню́дъ сподóбятся кóего покрóва.
10 Егдá же бы́сть сié, услы́шавъ [цáрь], я́ко нѣ́цыи от рóда и́хъ изъ грáда тáйно исхождáху чáсто оплáкивати безчéстную брáтiи бѣ́дность, разгнѣ́вався зѣ́ло, повелѣ́ со прилѣжáнiемъ и си́мъ тáкожде я́коже и óнѣмъ сотвори́ти, да никáкоже мéншую óнѣхъ возъимѣ́ютъ мýку, и написáти вся́ко колѣ́но по и́мени:
11 не къ мáло преждеобъя́вленнѣй многотрýднѣй рабóтѣ, но умýченныхъ повелѣ́нными кáзньми, въ конéцъ истреби́ти во врéмя еди́наго днé.
12 Бы́сть же ýбо си́хъ написáнiе съ гóрькимъ тщáнiемъ и любочéстнымъ присѣдѣ́нiемъ от восхóда сóлнечнаго дáже до захождéнiя, и не возмогóша концá сотвори́ти во днéхъ четы́редесятихъ.
13 Цáрь же непрестáнно рáдостiю вельми́ исполня́яся, пи́ршества у всѣ́хъ и́доловъ составля́я, заблуждéнымъ далéче от и́стины рáзумомъ и сквéрными усты́, нѣмáя ýбо и не могýщая глагóлати и́мъ или́ помощи́ похваля́я, на превели́каго же Бóга неподобáющая глагóля.
14 По предрѣчéннѣмъ же врéмене разстоя́нiи, возвѣсти́ша кни́жницы царю́, я́ко никáкоже ктомý мóгутъ описáнiе иудéй сотвори́ти, безчи́сленнаго рáди и́хъ мнóжества, и понéже сýть ещé премнóзи по странáмъ, инíи же по домóмъ обрѣтáются, а инíи по мѣстóмъ, я́ко не возмощи́ отню́дъ всѣ́мъ, и́же во Еги́птѣ, страти́гомъ сотвори́ти сегó.
15 Егдá же цáрь запрети́ и́мъ жесточáе, áки дарáми подкýпленымъ на ковáрство избѣжáнiя, случи́ся и́мъ извѣ́стнѣ егó о сéмъ увѣ́рити, глагóлющымъ съ показáнiемъ, я́ко и Хартiи́ ужé и писáтелныя трóсти, и́хже употребля́ху, оскудѣ́ша.
16 Сié же бѣ́ дѣ́йство помогáющаго Иудéемъ съ небесé прóмысла непобѣди́маго [Бóжiя].
5
1 Тогдá [цáрь] тя́жцѣ испóлненъ гнѣ́ва и я́рости, весьмá непремѣ́ненъ, призвáвъ éрмона слонóмъ начáлника, повелѣ́ во грядýщiй дéнь изоби́лнѣ накорми́ти слоны́ рукоя́тьми Ливáнскими и винóмъ мнóгимъ несмѣ́шенымъ всѣ́хъ напои́ти, и́хже бѣ́ числóмъ пя́ть сóтъ, и разсверѣ́пѣвшихъ от винá нещáдно дáннаго повести́ во срѣ́тенiе смéрти Иудéйскiя.
2 Сiя́ же повелѣ́въ возврати́ся на пи́ршество, собрáвъ наипáче тѣ́хъ другóвъ и вóиновъ, и́же ненави́дяху Иудéовъ: а слононачáлникъ éрмонъ повелѣ́нное прили́чно совершáше.
3 Къ си́мъ же слузи́ въ вéчеръ исходя́ще вязáху рýцѣ бѣ́дныхъ и прóчую ухищря́ху о ни́хъ стрáжу, мня́ще, я́ко въ нощи́ прiи́мутъ Иудéе вкýпѣ конéчную поги́бель.
4 Иудéе же вся́каго покрóва лишéни бы́ти непщýеми язы́комъ, рáди объе́мшiя и́хъ отвсю́ду во ýзахъ нýжды, вседержи́теля Гóспода и вся́кою си́лою обладáющаго ми́лостиваго Бóга своегó и Отцá непрестáннымъ вóплемъ вси́ со слезáми призывáху моля́щеся, да совѣ́тъ непрáведный, и́же на ни́хъ, премѣни́тъ и избáвитъ и́хъ от сýщiя предъ ногáма уготóванныя смéрти съ великолѣ́пнымъ явлéнiемъ.
5 Си́хъ ýбо прилѣ́жная моли́тва взы́де на небо: éрмонъ же неукроти́мыхъ слонóвъ напои́въ испóлненныхъ подая́нiемъ мнóгаго винá и Ливáномъ напитáвъ, рáно во двóръ прiи́де о си́хъ возвѣсти́ти царю́.
6 От вѣ́чнаго же врéмене благóе создáнiе въ нощи́ и во дни́ подавáемое от благодѣ́телствующаго всѣ́мъ, и́мже áще сáмъ хóщетъ, снá чáсть послá царю́.
7 Сладчáйшимъ же и глубóкимъ одержи́мь бѣ́ дѣ́йствiемъ Влады́ки, о беззакóннѣмъ ýбо предложéнiи мнóго прельсти́ся, въ непрелóжнѣмъ же совѣ́тѣ зѣ́лнѣ обольщéнъ бы́сть.
8 Иудéе же предназнáменованнаго часá избѣжáвше, святáго Бóга своегó восхваля́ху, и пáки моля́ху благопримири́телнаго, да покáжетъ великомóщныя своея́ руки́ держáву язы́комъ прегóрдымъ.
9 Преполовля́ющуся же ужé áки деся́тому часý, и́же ко звáнiю учинéнный, ви́дя звáнныхъ собрáвшихся, пришéдъ ко царю́ толкнý, и едвá возбуди́въ егó, показá пи́ра врéмя преходя́щее ужé, о си́хъ слóво предложи́въ: éже цáрь [въ себѣ́] размы́сливъ и обрáщься на пи́ръ, повелѣ́ пришéдшымъ на пи́ръ комýждо проти́ву себé возлещи́.
10 Егдá же бы́сть сié, поощря́ше въ пировáнiе вдáвшихся, дабы́ настоя́щую пи́ршества чáсть попремнóгу прáзднующе въ весéлiи препроводи́ли.
11 Мнóзѣй же бесѣ́дѣ бы́вшей, цáрь éрмона призвáвъ, съ гóрькимъ прещéнiемъ вопрошáше, кóея рáди вины́ остáвлени Иудéе въ сéй дéнь жи́ви бы́ти?
12 О́ному же показáвшу, я́ко нóщiю повелѣ́нное въ конéцъ приведé, ксемý же и другóмъ спослýшествовавшымъ семý бы́ти тáко, свирѣ́пство лютѣ́йшо пáче Фалари́да имѣ́я, речé: днéшнему снý благодáрство да и́мутъ:
13 ты́ же непрелóжнѣ во грядýщiй дéнь по прéжнему уготóви слоны́ въ погублéнiе беззакóнныхъ Иудéевъ.
14 Сiя́ же рéкшу царю́, любéзнѣ вси́ съ рáдостiю присýтствующiи кýпно восхвали́вше, кíйждо въ дóмъ свóй отидóша: и не тáко на сóнъ изнури́ша врéмя нощнóе, я́ко на ухищрéнiе вся́кихъ поругáнiй мни́мымъ окая́ннымъ.
15 Егдá же алéкторъ возгласи́ ýтреннiй, и звѣ́ри вооружи́въ éрмонъ на вели́цѣмъ дворѣ́ поощря́ше: во грáдѣ же мнóжество нарóда собрáшася на жáлостное позóрище, ожидáюще ýтра со тщáнiемъ.
16 Иудéе же безпрестáнно от души́ стеня́ще, многослéзную моли́тву съ плачéвными пѣ́сньми [творя́ху] простирáюще рýцѣ на нéбо, моля́ху вели́каго Бóга пáки и́мъ помощи́ вскóрѣ.
17 Ещé же сóлнечнiи лучи́ не разсѣ́яшася, и царю́ другóвъ прiéмлющу, éрмонъ предстáвъ звáше ко исхождéнiю, показýя превозжелѣ́нное царéмъ готóво бы́ти.
18 О́нъ же услы́шавъ и ужаснýвся о пребеззакóннѣмъ изшéствiи, по всемý невѣ́дѣнiемъ одержи́мь бы́въ вопрошáше: чтó дѣ́ло сié, éже вскóрѣ емý соверши́? Сié же бѣ́ дѣ́йствiе всѣ́ми Влады́чествующаго Бóга, и́же предуготóванная на иудéи [мучéнiя] въ забвéнiе емý вложи́.
19 Е́рмонъ же покáзоваше и вси́ дрýзи, я́ко звѣ́рiе и вóи уготóвани сýть, о, царю́! по твоемý понуждáющему повелѣ́нiю.
20 О́нъ же о рѣчéнныхъ испóлнися тя́жкiя я́рости, я́ко о си́хъ прóмысломъ Бóжiимъ разори́ся всé егó умышлéнiе, воззрѣ́въ речé съ прещéнiемъ:
21 áще тебѣ́ роди́теле бы́ли бы, или́ чáдъ роди́телницы, свирѣ́пымъ и ди́вiимъ звѣрéмъ уготóвали бы изоби́лную пи́щу вмѣ́сто непови́нныхъ, мнѣ́ и прароди́телемъ мои́мъ показáвшихъ всецѣ́лую твéрдую вѣ́рность изря́дно Иудéевъ: тó áще не любвé рáди совоспитáтелныя и потрéбы, животá вмѣ́сто си́хъ лишéнъ бы́лъ бы еси́.
22 Си́це éрмонъ нечáянное и пребѣ́дственное подъя́ прещéнiе и зрáкомъ и лицéмъ измѣни́ся. И кíйждо от дрýговъ сѣ́тованiемъ одержи́ми бы́вше, сóбранныхъ отпусти́ша коегóждо на своé дѣ́ло.
23 Иудéе же я́же от царя́ услы́шавше, явлéннаго Бóга [и Гóспода] и Царя́ царéй хваля́ху, получи́вше сiю́ пóмощь егó.
24 По си́мъ же обы́чаемъ цáрь пáки состáвивъ пи́ръ, моля́ше [другóвъ] на весéлiе премѣни́тися. Е́рмона же призвáвъ съ прещéнiемъ речé: кóль крáты потрéбно тебѣ́ о тóмже повелѣвáти, преокая́нне! ещé и ны́нѣ вооружи́ слоны́ во ýтрiе на погублéнiе Иудéйское.
25 Совозлежáщiи же срóдницы непостоя́нному егó смы́слу дивя́щеся, произнесóша сiя́: докóлѣ, о, царю́, áки безсловéсныхъ нáсъ искушáеши, повелѣвáя ужé трéтiе си́хъ погуби́ти и пáки о вéщехъ премѣ́нно разрѣшáя, я́же тобóю повелѣ́нная?
26 и́хже рáди грáдъ о ожидáнiи стужáетъ, и испóлнися ужé смятéнiя, и бѣ́дствуетъ мнóжицею расхищéнъ бы́ти.
27 Отонýдуже цáрь испóлнився безсловéсiя по всемý, áки Фалари́дъ, и бы́вшая ко призрѣ́нiю Иудéйску въ себѣ́ премѣнéнiя души́ ни во чтó вмѣни́въ,
28 нечести́вѣйшею подтверди́ кля́твою, опредѣли́въ си́хъ ýбо неотлóжно послáти во áдъ ногáми и копы́ты звѣ́рскими сокрушéнныхъ, на Иудéю же пошéдъ съ вóинствомъ, огнéмъ и копiéмъ со землéю соравни́ти вскóрѣ, и невхóдный нáми хрáмъ и́хъ огнéмъ сожещи́ áбiе, и совершáющихъ тáмо жéртвы пýстъ въ вѣ́чное врéмя постáвити.
29 Тогдá съ рáдостiю дрýзи и срóдницы отшéдше, съ вѣ́рою повелѣ́ша вóиномъ стрещи́ угóдная мѣстá грáда.
30 Слононачáлникъ же звѣ́ри, áки бы рещи́, въ состоя́нiе неи́стовое привéдъ благовóнными питiя́ми винá съ Ливáномъ смѣ́шенаго, стрáшными орýдiями устрóенныя, ýтро рáно, грáду ужé мнóжествы безчи́сленными на мѣ́стѣ кóнскаго ристáнiя напóлнену бы́вшу, вшéдъ во двóръ на предлежáшее поощря́ше царя́.
31 Цáрь же гнѣ́вомъ тя́жкимъ напóлнивъ злочести́вое сéрдце, всéю си́лою со звѣрьми́ свирѣ́пыми изы́де, хотя́щь неукроти́мымъ сéрдцемъ и зѣ́ницами очéсъ ви́дѣти болѣ́зненную и бѣ́дственную проназнáменованыхъ пáгубу.
32 Егдá же слоны́ исхождáху вратáми, и спослѣ́доваша и́мъ вóини вооружéннiи, и от мнóгихъ шéствiя прáхъ уви́дѣвше и тя́жка глáса кли́чь услы́шавше Иудéе, возмнѣ́вше себѣ́ бы́ти послѣ́днiй конéцъ животá своегó во мгновéнiи,
33 от бѣ́днаго чáянiя во умилéнiе и стенáнiе премѣни́вшеся, облобызáху дрýгъ дрýга сплетáющеся со срóдники и на вы́и напáдающе роди́теле чáдомъ и мáтери ю́нотамъ,
34 и́ны же новорождéнныхъ у сосцéвъ имýщя младéнцевъ послѣ́днее ссýщихъ млекó:
35 обáче воспомянýвше и преждебы́вшая и́мъ съ небесе защищéнiя, единодýшнѣ ни́цъ повéргше себé и младéнцы отлучи́вше от сосéцъ, возопи́ша глáсомъ вéлiимъ зѣлó,
36 вся́кiя си́лы обладáтеля моля́ще, да ущéдритъ и́хъ съ явлéнiемъ, при вратѣ́хъ áда ужé стоя́щихъ.
6
1 Елеазáръ же нѣ́кто мýжъ знамени́тый от иерéй страны́ тоя́, въ стáрости лѣ́тъ ужé дости́гъ и вся́кою добродѣ́телiю въ житiи́ укрáшенъ, о́крестъ себé устрóивъ пресви́теры призывáти святáго Бóга, моля́шеся си́це:
2 Царю́ великодержáвный, вы́шнiй, вседержи́телю Бóже, и́же создáнiе всé стрóяй въ щедрóтахъ, воззри́ ны́нѣ на сѣ́мя Авраáмле, на освящéннаго Иáкова чáда, чáсти свяшéнныя людíй твои́хъ, въ земли́ чуждéй стрáнствующихъ, непрáведно погибáющихъ, óтче!
3 ты́ фараóна пéрвѣе Еги́птомъ си́мъ обладáющаго, умнóженаго въ колесни́цахъ, вознéсшагося беззакóнною дéрзостiю и язы́комъ велерѣ́чивымъ, съ гóрдымъ вóинствомъ въ пóнтѣ погружéнныхъ погуби́лъ еси́, рóду же Изрáилеву свѣ́тъ прояви́лъ еси́ ми́лости:
4 ты́ безчи́сленными си́лами возвели́чившагося сеннахири́ма тя́жкаго царя́ Ассирíйскаго, копiéмъ подрýчну ужé сотвори́вшаго всю́ зéмлю и вознéсшагося на святы́й твóй грáдъ, хýльная глагóлющаго съ кичéнiемъ и дéрзостiю, Влады́ко, сокруши́лъ еси́, извѣ́стну показáвъ язы́комъ мнóгимъ твою́ держáву:
5 ты́ въ Вавилóнѣ трiéхъ отрокóвъ огню́ дýшы самовóльнѣ предáвшихъ, за éже не служи́ти сквéрнымъ, разжжéнную ороси́въ пéщь, избáвилъ еси́ дáже до влáса невреди́мыхъ, плáмень на вся́ послáвъ сопроти́вныя:
6 ты́ данiи́ла оболгáньми зави́стными ввéржена въ рóвъ на снѣдéнiе львóмъ звѣрéмъ свирѣ́пымъ, на свѣ́тъ извéлъ еси́ здрáва: и Иóну во чрéвѣ ки́та морскáго тáющаго нещáднѣ, всѣ́мъ свои́мъ невреди́ма показáлъ еси́, óтче!
7 и ны́нѣ, оби́дъ ненави́стниче, многоми́лостиве, всѣ́хъ покрови́телю, вскóрѣ яви́ся сýщымъ от рóда Изрáилева, от язы́къ же беззакóнныхъ мéрзкихъ оби́димымъ:
8 áще же нечéстiемъ объя́то éсть въ преселéнiи житié нáше, ты избáвивъ нáсъ от рукý врáгъ си́хъ, я́коже произвóлиши, Влады́ко, погуби́ нáсъ смéртiю,
9 да не сýетными суемýдреннiи похвáлятся о погублéнiи возлю́бленныхъ твои́хъ, глагóлюще: нижé Бóгъ и́хъ избáви и́хъ:
10 ты́ же вся́ку си́лу и крѣ́пость имѣ́яй всю́, превѣ́чный, ны́нѣ́ при́зри,
11 поми́луй нáсъ, оби́дою беззакóнныхъ безсловéсною животá лишáемыхъ о́бразомъ предáтелей,
12 да удивя́тся ны́нѣ язы́цы непобѣди́мѣй крѣ́пости твоéй, пречестне, имѣ́яй си́лу о спасéнiи рóда Иáковля:
13 мóлитъ тя́ всé мнóжество младéнцевъ и роди́теле и́хъ со слезáми: да покáжется всѣ́мъ язы́комъ, я́ко съ нáми еси́, Гóсподи, и не отврати́лъ еси́ лицá твоегó от нáсъ:
14 но я́коже рéклъ еси́, я́ко нижé въ земли́ врагóвъ свои́хъ сýщихъ презрѣ́лъ еси́ и́хъ, си́це соверши́, Гóсподи.
15 Елеазáру же кончáющу ужé моли́тву сiю́, цáрь со звѣрьми́ и всéю си́лы гóрдостiю прибли́жися ко ипподрóму.
16 Уви́дѣвше же Иудéе, вельми́ возопи́ша на небо, я́ко и прилежáщая удóлiя кýпно съ ни́ми вопiю́щая неудержи́мь плáчь сотвори́ша всемý вóинству.
17 Тогдá великослáвный вседержи́тель и и́стинный Бóгъ, яви́въ святóе своé лицé, отвéрзе двéри небéсныя, изъ ни́хже снидóста двá слáвна, стрáшна ви́домъ áнгела явлéннѣ всѣ́мъ кромѣ́ Иудéовъ,
18 и сопротивостáста, и си́лу супостáтъ испóлниста смятéнiя и ýжаса, и неподви́жными пýты связáста: тáкожде и тѣ́ло цáрское трéпетно бы́сть, и забвéнiе дéрзость егó тя́жкую объя́.
19 И обрати́шася звѣ́рiе на послѣ́дующыя вооружéнныя си́лы, и попирáху и́хъ и погубля́ху.
20 И обрати́ся гнѣ́въ цáрскiй во умилéнiе и слéзы о предуготóванныхъ от негó мучéнiихъ.
21 Услы́шавъ бо вóпль и ви́дѣвъ преклонéнныхъ всѣ́хъ въ погублéнiе, прослези́вся со гнѣ́вомъ другóмъ прещáше, глагóля:
22 вы злѣ́ цáрство управля́ете и мучи́телей превосхóдите лю́тостiю, и менé самáго вáшего благодѣ́теля тщитéся от влáсти ужé и дýха низложи́ти, тáйно ухищря́юще неполéзная цáрству:
23 ктó держáвшихъ нáшя въ вѣ́рности страны́ тверды́ни, от дóму отлучи́въ, коегóждо безсловéснѣ собрá сѣ́мо?
24 ктó си́хъ, и́же изъ начáла благопрiя́тствомъ къ нáмъ по всемý превосхóдятъ всѣ́хъ язы́ковъ и злѣ́йшыя мнóжицею от человѣ́къ подъя́ша бѣды́, си́це беззакóнными обложи́ ýзами?
25 рѣши́те, разрѣши́те непрáведныя ýзы и во своя́ и́хъ съ ми́ромъ посли́те, о преждесодѣ́ланныхъ примири́вшеся: разрѣши́те сы́ны вседержи́теля небéснаго Бóга живáго, и́же от нáшихъ прароди́телей дáже доны́нѣ непреткновéнно во слáвѣ благостоя́нiе подаéтъ вéщемъ нáшымъ.
26 Рéкшу же ýбо емý сiя́, Иудéе вскóрѣ разрѣшéни бы́вше благословля́ху, ужé избѣжáвше смéрти, святáго спаси́теля Бóга своегó.
27 Посéмъ цáрь во грáдъ возврати́вся и призвáвъ надъ росхóды старѣ́йшаго, повелѣ́ дая́ти винó и прóчая къ пировáнiю потрéбная Иудéомъ на днíй сéдмь, суди́въ и́мъ тáможде во вся́цѣмъ весéлiи дéнь спасéнiя провождáти, въ нéмже мѣ́стѣ мнѣ́ша поги́бель прiя́ти.
28 Тогдá сíи, и́же прéжде въ поношéнiи и бли́зъ áда бы́ша, пáче же въ негó сошéдшiи, вмѣ́сто гóрькiя и плачéвныя смéрти, пи́ршество спасéнiя состáвивше, мѣ́сто уготóванное и́мъ ко падéнiю и грóбу, на возлежáнiя раздѣли́ша, испóлнени рáдости.
29 И остáвивше рыдáнiя всеплачéвную пѣ́снь, воспрiя́ша пѣ́снь отéческую, хвáляще спаси́теля и чудодѣ́теля Бóга: и вся́кiй плáчь и стенáнiе отри́нувше, ли́ки состáвиша во знáменiе весéлiя ми́рнаго.
30 Тáкожде и цáрь о си́хъ состáвивъ пировáнiе вéлiе, безпрестáнно на небо исповѣ́дашеся великолѣ́пнѣ о преслáвнѣмъ бы́вшемъ себѣ́ спасéнiи.
31 Полагáвшiи же Иудéевъ прéжде въ поги́бель и въ снѣ́дь пти́цамъ и съ рáдостiю описáвшiи, срамотóю объя́ти бы́вше стеня́ху, огнедыхáтелнѣй и́хъ дéрзости безчéстно угáсшей.
32 Иудéе же, я́коже предрекóхомъ, состáвивше предрѣчéнный ли́къ, со учреждéнiемъ во исповѣ́данiихъ весéлыхъ и псалмѣ́хъ провождáху,
33 и óбщiй опредѣли́вше о си́хъ устáвъ, во вся́цѣмъ преселéнiи своéмъ въ рóды, éже бы предречéнныя дни́ прáздновати въ весéлiи, не питiя́ рáди и ядéнiя, но спасéнiя рáди бы́вшаго и́мъ от Бóга.
34 Прiидóша же ко царю́ прося́ще отпущéнiя во своя́ си.
35 Опи́сани же бы́ша от двáдесять пя́таго днé мéсяца пахóна дáже до четвéртаго днé мéсяца епифá, во днéхъ четы́редесятихъ: состáвиша же и́мъ поги́бель от пя́таго днé мéсяца епифá дáже до седмáго, въ въ трiéхъ днéхъ: въ ни́хже и преслáвно яви́въ ми́лость свою́ всеси́льный, избáви и́хъ безврéдныхъ кýпно.
36 Пи́ршествоваша же всѣ́ми от царя́ снабдѣвáеми дáже до четвертагонáдесять днé, въ óньже и прошéнiе сотвори́ша о отпущéнiи своéмъ.
37 Похвали́въ же и́хъ цáрь, написá и́мъ нижепи́санное послáнiе ко страти́гомъ сýщымъ по градóмъ, великодýшнѣ усéрдiе имýщее.
7
1 Цáрь Птоломéй Филопáторъ, сýщымъ во Еги́птѣ страти́гомъ и всѣ́мъ вчинéннымъ надъ дѣлáми, рáдоватися и здрáвствовати: здрáвствуемъ же и мы́ и чáда нáша, управля́ющу нáмъ вели́кому Бóгу вéщы, я́коже желáемъ:
2 нѣ́цыи дрýзи нáши злонрáвiемъ свои́мъ чáстѣе нáмъ прилѣжáще, поусти́ша нáсъ на сié, éже бы во цáрствiи нáшемъ собрáти всѣ́хъ Иудéовъ во еди́но мѣ́сто áки отстýпниковъ и умýчити стрáнными мýками,
3 сказýюще, я́ко никогдáже во благостоя́нiи цáрства нáшего вéщы бýдутъ, вражды́ рáди, ю́же и́мутъ сíи ко всѣ́мъ язы́комъ, донéлѣже не соверши́тся сié:
4 и́же и свя́заныхъ и́хъ приведóша къ нáмъ со озлоблéнiемъ я́ко плѣ́нниковъ, пáче же я́ко предáтелей, безъ вся́каго разсуждéнiя и испытáнiя хотѣ́ша и́хъ погуби́ти, свирѣ́пѣйшею лю́тостiю пáче закóна ски́ѳска вооружéни:
5 мы́ же о си́хъ жесточáе запрети́вше по смиренномýдрiю, éже и́мамы ко всѣ́мъ человѣ́комъ, едвá живóтъ и́мъ даровáвше, и небéснаго Бóга познáвше крѣ́пко заступáющаго Иудéевъ и я́ко Отцá за сы́ны вы́ну спобóрствующа, ксемý же и любо́вь, ю́же и́мутъ къ нáмъ извѣ́стну, и ко прароди́телемъ нáшымъ благопрiя́тство разсуди́вше, прáведно отпусти́хомъ, по вся́кому коея́ либо вины́ о́бразу:
6 и повелѣ́хомъ комýждо всѣ́мъ во своя́ и́мъ возврати́тися, дабы́ на вся́цѣмъ мѣ́стѣ никтó и́хъ отню́дъ озлобля́лъ, нижé укаря́лъ о содѣ́янныхъ и́мъ безъ вины́:
7 вѣ́домо бо да бýдетъ вáмъ, я́ко áще чтó злоухи́тримъ на ни́хъ лукáвое, или́ въ чéмъ оскорби́мъ и́хъ весьмá, тó не человѣ́ка, но всѣ́хъ си́лъ Влады́ку и Бóга вы́шняго проти́вящася нáмъ во отмщéнiе вещéй по всемý неизбѣ́жнѣ всегдá имѣ́ти бýдемъ. Здрáвствуйте.
8 Прiи́мше же [Иудéе от царя́] послáнiе сié, не потщáшася вскóрѣ отити́, но моли́ша царя́, дабы́ сýщiи от рóда Иудéйска, от святáго Бóга и от закóна Бóжiя самовóльнѣ отступи́вшiи получи́ли и́ми дóлжное мучéнiе,
9 приглагóлавше, я́ко чрéва рáди своегó Божественная повелѣ́нiя преступи́вшiи нижé цáрскимъ повелѣ́ниемъ благопослýшни бýдутъ.
10 О́нъ же пои́стиннѣ сiя́ глагóла тáко бы́ти, и похвали́въ дадé и́мъ влáсть надъ всѣ́ми, éже бы престýпниковъ закóна Бóжiя во всѣ́хъ мѣ́стѣхъ цáрствiя егó со дерзновéнiемъ, безъ вся́кiя цáрскiя влáсти или́ разсмотрéнiя, убивáти и искореня́ти.
11 Тогдá [Иудéе] возблагодари́вше [царя́] я́коже подобáше, иерéе же и́хъ и всé мнóжество вкýпѣ возгласи́вше аллилýiа, съ рáдостiю отидóша.
12 Тогдá приклю́чшагося на пути́ престýпника, и́же бя́ше от рóда и́хъ, мýчаху и во о́бразъ ины́мъ убивáху.
13 И въ дéнь тóй уби́ша бóлѣе трiéхъ сóтъ мужéй, убивáюще же сквéрныхъ съ рáдостiю веселя́хуся.
14 Сáми же и́же дáже до смéрти со Гóсподемъ Бóгомъ пребы́ша, получи́вше совершéнное спасéнiе, увѣнчáвше себé разли́чными благовóннѣйшими цвѣтáми, отидóша от грáда со весéлiемъ и восклицáнiемъ, во хвалéнiихъ и всеблагоглáсныхъ пѣ́нiихъ благодаря́ще Бóгу отцéвъ и́хъ вѣ́чному, Спáсу Изрáилеву.
15 Пришéдше же во Птолемаи́ду, нарицáемую за свóйство мѣ́ста родофóръ, идѣ́же ожидáху и́хъ корабли́ мнóзи, по óбщему и́хъ совѣ́ту днíй сéдмь,
16 тáмо сотвори́ша пи́ръ Спáсенiя: цáрь бо даровá благодýшно коемýждо и́хъ вся́ потрéбная на пýть дáже до жили́ща и́хъ.
17 Дости́гше же ми́рно въ подобáющихъ исповѣ́данiихъ, тáкожде и тáмо устáвиша сiя́ дни́ прáздновати со весéлiемъ во врéмя пришéлствiя и́хъ.
18 И́хже и освяти́вше на столпѣ́ при мѣ́стѣ пи́ршества обѣ́томъ утверди́вше, отидóша неврéдни, свобóдни, прерáдостни, землéю и мóремъ и рѣкóю, охраня́еми цáрскимъ повелѣ́нiемъ, кíйждо во своя́ си, и одержáвше влáсть надъ враги́ бóлшую нéже прéжде, со слáвою и стрáхомъ, весьмá ни от когó лишáеми имѣ́нiя.
19 И вся́ своя́ вси́ воспрiя́ша от описáнiя, я́ко имýщiи чтó со стрáхомъ вéлiимъ отдая́ху и́мъ, вели́чiя превели́кому Бóгу сотвóршу совершéнно во спасéнiе ихъ.
20 Благословенъ избáвитель Изрáилевъ во вѣ́чная временá. Ами́нь.

{показать одну главу на странице}

 Первое послание св. Ап. Павла к Коринфянам (1Кор) Неделя четвертой седмицы, Иоанна Лествичника Великая Среда great and holy wednesday Суббота первой седмицы Суббота первой седмицы saturday of the first week. Православное осмысление творения мира. Выпуск 4 вторая книга царств • www.церковно-славянская-библия.рф Общей целью написания всех книг Царств можно предположить изображение политического состояния еврейского народа в связи с религиозно-нравственной его жизнью или состояния веры при царях. Книга Пророка Авдия к тимофею • www.церковно-славянская-библия.рф к тимофею послание апостола павла К евреем послание святого апостола Павла the Epistle of the holy apostle paul to the hebrews послание иеремии • www.церковно-славянская-библия.рф послание Иеремии Неделя шестая по Пасхе, о слепом the sixth sunday after pascha, the sunday of the man Born Blind. Церковно-славянский язык Книга Пророка Захарии Служба во вторник — Предтече Второе послание к Тимофею святого апостола Павла Первое Соборное послание св. Ап. Петра (1Петр) #text =
channel = https://yandex.ru/blogs/rss/search? — Яндекс.Поиск по блогам https://img.yandex.net/i/logo100x43.png Поиск Яндекса по блогам https://yandex.ru/blogs 100 43 60 yandex.ru/blogs support@blogs.yandex.ru noindex Результаты поиска Яндекса по блогам и форумам по запросу: «» 0 en-usnoindexnonadultnoРезультаты поиска Яндекса по блогам и форумам по запросу: «»
#text =
Яндекс.Метрика
  HotLog ЧИСТЫЙ ИНТЕРНЕТ о Библии Rambler's Top100